Батыс Қазақстан облысында Қазақстан Республикасы Президентінің Кеңесшісі Мәлік Отарбаев қатысқан облыстық актив жиыны ұйымдастырылды. Жиынды облыс әкімі Нариман Төреғалиев ашып, төрағалық етті.
Кездесуде Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауындағы тапсырмаларды өңірлік деңгейде іске асыру мәселелері қаралды.
Облыс әкімі өз сөзінде Президент Жолдауының еліміздің стратегиялық дамуы үшін маңызды құжат екенін атап өтті. Сонымен қатар, өңірдің әлеуметтік-экономикалық дамуы, инвестиция тарту және өнеркәсіп саласындағы ірі жобалардың жүзеге асуы жайында баяндама жасады.
Актив барысында аудан және ауылдық округ әкімдері өз аймақтарындағы жобалардың орындалу барысы мен даму жоспарлары туралы ақпарат берді.
Мәлік Отарбаев өз сөзінде Президенттің тапсырмаларын сапалы орындауда өңірлердің белсенділігі мен жауапкершілігі шешуші мәнге ие екенін айтты. Сондай-ақ, Батыс Қазақстан облысының әлеуметтік-экономикалық дамуына тоқталып, Жолдауда белгіленген басым бағыттарды тиімді жүзеге асыру үшін барлық салада жүйелі әрі үйлесімді жұмыс қажет екенін ерекше атап өтті.
Сурет: БҚО әкімдігі
