Батыс Қазақстан облысында батпаққа батып қалған жеңіл көліктің ішінде болған алты адам эвакуацияланды, деп хабарлайды Zhaiyqmedia ақпарат агенттігі.
Оқиға Ақжайық ауданына қарасты Бударин ауылдық округінде, Самал және Бударин ауылдарының арасында болған. «Атырау-Орал» тасжолынан 18 шақырым қашықтықтағы «Самаркино» су қоймасының маңында жеңіл көлік лайсаң жолда батып, шыға алмай қалған.
Шақырту орнына жеткен Төтенше жағдайлар министрлігінің құтқарушылары көліктегі алты адамды қауіпсіз жерге көшіріп, жақын маңдағы елді мекенге жеткізді.
Құтқарылған азаматтардың денсаулығына қауіп төнбеген. Олар медициналық көмекке мұқтаж болмады.
Фото: Әлеуметтік желіден
