Бүгін БҚО қоғамдық кеңесінің кеңейтілген отырысы өтті. Жиынға аймақ басшысының орынбасарлары, өңірдегі барлық деңгейдегі қоғамдық кеңес мүшелері қатысты.
Төртінші сайланымдағы консультативтік-кеңесші органның 5 тұрақты комиссиясы бар. Олар бюджет қаржысының мақсатты жұмсалуын қадағалау, сыбайлас жемқорлық тәуекелдерін азайту, «заң мен тәртіп» қағидатын ілгерілету, әлеуметтік мәселелерді зерделеу, азаматтық қоғаммен байланысты арттыру және жастарды қолдау бағытында жұмыстанады. Барлық ауданға іссапарлар ұйымдастырылып, халық аманаты негізінде құзырлы құрылымдарға ұсыным хаттар жолданған. Осы және өзге де іс-шаралар туралы облыстық қоғамдық кеңестің төрағасы Бауыржан Атауовтың баяндамасында айтылды.
ҚР Президенті жанындағы Ұлттық құрылтай және облыстық қоғамдық кеңестің мүшесі Бауыржан Ғұбайдуллин Қызылорда қаласында өткен алқалы жиында айтылған елдік мәселелерге үн қосу, азаматтық жауапкершілікті терең сезінудің маңызына тоқталды.
«Халық үніне құлақ асатын мемлекет» қағидатының түпкі мәні – азаматтардың талап-тілегіне әділ және уақытылы ден қою, мемлекет пен қоғам арасында тұрақты әрі жүйелі диалог орнату. Облыс әкімінің орынбасары Тілепберген Каюпов атқарушы орган алдағы уақытта да азаматтық қоғаммен жан-жақты байланыс орнатуға дайын екенін мәлімдеп, өңірдің әлеуметтік-экономикалық даму көрсеткіштері туралы баяндама жасады. Қоғамдық кеңес мүшелері тарапынан электр желілерін жаңғырту, мал басын асылдандыру, ауылдарды инфрақұрылыммен қамтамасыз ету, жол-көлік апаттарын азайту мақсатында «Орал-Атырау» бағытында теміржол салу сияқты маңызды мәселелер көтерілді. Осы және өзге де сауалдарға облыс әкімінің орынбасарлары жауап берді.
Өңірдегі оң өзгерістер мен өзекті мәселелерді жан-жақты талқылаған облыстық қоғамдық кеңес мүшелері аймақ басшылығының жұмысына оң бағасын берді.
