Астана соты танымал блогерлер Ерболат Жаңабылов пен Эльмира Төлегенованың ісі бойынша негізгі сот талқылауының уақытын бекітті. Тыңдау 16 наурызда ашық режимде басталады, деп хабарлайды Zhaiyqmedia ақпарат агенттігі.
Ерлі-зайыпты Жаңабыловтарға Қазақстан Республикасы Қылмыстық кодексінің 214-бабы («Заңсыз кәсіпкерлік») және 218-бабы («Қылмыстық жолмен алынған ақшаны немесе өзге мүлікті заңдастыру») бойынша айып тағылып отыр.
Тергеу нұсқасы бойынша, олар өздерінің онлайн-курстарын сатуды жарнамалау үшін жалған автокөлік ұтысын ұйымдастырған. Бұған дейін Туризм министрлігі аталған курстардың ешқандай құндылығы жоқ екенін мәлімдеген болатын.
Ақпан айынан бері айыпталушылар үйқамақта отыр. Сот олардың процесті жабық өткізу туралы өтінішін қанағаттандырмады, бірақ журналистерге сотталушыларды видеоға түсіруге тыйым салды.
Фото: Әлеуметтік желіден
