Батыс Қазақстан облысында биыл ветеринариялық қауіпсіздікті қамтамасыз етуге бөлінген қаржы көлемі айтарлықтай өсіп, 4,8 млрд теңгеге жетті. Оның 89 пайызы жергілікті бюджет есебінен қаржыландырылады. Бұл өткен жылмен салыстырғанда шамамен 28 пайызға жоғары. Қаржының артуы сала қызметкерлерінің еңбекақысын көтеруге және ветеринариялық ұйымдарды материалдық-техникалық тұрғыдан жаңартуға мүмкіндік берді. Мал дәрігерлерінің орташа айлығы 309–320 мың теңге көлеміне жетсе, фельдшерлер 228–256 мың теңге, санитарлар 160–190 мың теңге шамасында еңбекақы алуда.
Облыс бойынша 2025 жылға жануарлардың аса қауіпті 12 ауруына қарсы 11 млн-нан астам мал басын егу және 2 млн малды диагностикалық тексеруден өткізу жоспарланған. Қажетті вакциналардың басым бөлігі жеткізіліп, жыл басынан бері 9,6 млн-нан астам малға түрлі профилактикалық екпелер салынды. Сібір жарасына қарсы 2,8 млн малға вакцина егілді. Препараттарды сақтау үшін 181 тоңазытқыш, арнайы қоймалар мен бөлмелер қолданылуда.
Эпизоотиялық жағдай негізінен тұрақты. Биыл облыс аумағында сібір жарасы анықталмаған. Дегенмен құтырудың 3 ошағы және бруцеллездің 1 ошағы тіркелген, бұл аймақтарда қажетті ветеринариялық іс-шаралар толық жүргізілді.
Бруцеллез бойынша зерттеу жұмыстары жалғасуда: 804 мыңнан астам ірі қара тексеріліп, 0,6 пайызы оң нәтиже берген; ұсақ мал арасында бұл көрсеткіш 0,1 пайыз деңгейінде.
Ауру малдарды санитариялық сою жұмыстары да жүйелі атқарылуда. Жыл басынан бері 5 мыңнан астам ірі қара және 856 ұсақ мал арнайы бекітілген алаңдарда жойылды.
Облыста 13 ветеринариялық станция және 147 ветеринариялық пункт бар. Қазіргі уақытта олардың 34-і арнайы ғимараттармен қамтылған. 2025 жылы жаңа ветеринариялық объектілер ашу жұмыстары жалғасып, бүгіннің өзінде 15 жаңа пункт іске қосылды.
Соңғы екі жылда ветеринариялық станциялардың автокөлік паркі толық жаңартылып, 149 жаңа көлік сатып алынды. Бұл шалғай елді мекендерге жедел жетуге мүмкіндік беріп отыр.
Облыс аумағында 222 сібір жарасы көміндісі тіркелген. Бүгінгі таңда олардың барлығы қоршалып, қауіпсіздік талаптарына сай күшейтілді. Сонымен бірге биыл жаңа мал қорымдарын салу жұмыстары қолға алынып, жоспарланған 29 нысанның 8-і пайдалануға берілді.
Бірдейлендіру жұмыстары кестеге сай жүргізілуде. Малдардың құлақ сырғаларымен қамтамасыз етілуі толық көлемде орындалған.
Қаңғыбас иттерді аулау және биостерилизациялау жұмыстарына 73,3 млн теңге қарастырылып, жыл басынан 6,5 мың жануар ауланған. Олардың жартысына жуығы зарарсыздандырылып, қайта босатылса, қалғандары тұрғындардың шағымдары негізінде жойылды.
