Батыс Қазақстан облысы әкімінің орынбасары Мирас Мүлкәйдің төрағалығымен Мемлекет басшысының тапсырмасына сәйкес өңірде барлық ауыл тұрғындарын таза ауыз сумен толық қамтамасыз ету мәселесіне арналған жиын өтті.
Жиын барысында облыстық құрылыс басқармасының басшысы Нүркен Молдашев облыс көлемінде атқарылып жатқан ауыз су жобалары туралы баяндама жасады.
Оның айтуынша, 2024 жылдың басында облыстағы 307 елді мекен таза ауыз сумен қамтылған. Бұл көрсеткіш өңір халқының 97%-ын құрайды. Биылғы жылы 35 мыңнан астам тұрғыны бар 20 ауылға су құбыры тартылып, бұл мақсатқа 5,7 млрд теңге бөлінді. Сонымен қатар, шамамен 1 мың тұрғыны бар 12 ауылда кешенді блок-модульдер орнатылды.
Алдағы 2025 жылы тағы 15 ауылдық елді мекенді (4 мың адам) сапалы ауыз сумен қамтуды көздейтін 14 жобаны іске асыру жоспарланып отыр. Бұған қоса, жергілікті бюджет есебінен 40 ауылда кешенді блок-модульдер орнатылады.
Жиында аудан әкімдері мен олардың орынбасарлары, сондай-ақ құрылысқа жауапты мердігер ұйымдардың өкілдері жүргізіліп жатқан жұмыстардың барысы туралы баяндап, туындаған мәселелерді талқылады.
Облыс әкімінің орынбасары Мирас Мүлкәй су тарту жобаларының сапасы мен уақтылы орындалуына ерекше назар аудару қажеттігін атап өтіп, бұл бағыттағы жұмыстардың үнемі бақылауда болатынын жеткізді.
