Астанада бүгін талантты қазақстандық жастарға арналған «Дарын» мемлекеттік жастар сыйлығының лауреаттарын марапаттау рәсімі өтті. Биыл мәдениет, ғылым, медиа, спорт және креативті индустрия салаларында үздік нәтижелер көрсеткен 20 жас жеңімпаз атанды. Олардың қатарында халықаралық және республикалық жарыстардың жеңімпаздары, ғылыми жобалар авторлары, қоғам өміріне белсенді атсалысып жүрген жастар бар.
Шара барысында құттықтау сөз сөйлеген ҚР Мәдениет және ақпарат министрі Аида Балаева мемлекет тарапынан жастарды қолдау тетіктері жылдан жылға күшейіп келе жатқанын атап өтті. Оның айтуынша, Президент бастамаларынан кейін жоғары білімнің қолжетімділігі артты, жас ғалымдарға арналған гранттар көбейді, еңбек нарығындағы жастар мүмкіндіктерін кеңейтуге бағытталған жобалар іске асуда. Сонымен бірге креативті индустрия, цифрландыру және кәсіпкерлік салаларын дамытуға арналған жаңа бастамалар да жастар үшін тың мүмкіндіктер ашуда.
«Президенттің әрбір реформасы жастардың болашағы мен дамуына бағытталған. Әсіресе “Заң және тәртіп”, “Таза Қазақстан” сияқты бастамаларды жастардың белсенді қолдап келе жатқаны қуантады. Бұл — жаңа идеологияның өзегі. Ал оны жүзеге асыратын да — өздеріңіз», — деді министр.
Биылғы лауреаттар келесі номинациялар бойынша анықталды: «Ғылым», «Эстрада», «Классикалық музыка», «Халық шығармашылығы», «Спорт», «Дизайн және бейнелеу өнері», «Журналистика», «Қоғамдық қызмет», «Театр және кино», «Әдебиет».
2025 жылғы жеңімпаздар арасында танымал әнші Еңлік Құрарбек (Yenlik), «Славян базары–2024» халықаралық байқауының бас жүлдегері Ерназар Жұбан, «Қайрат» футбол клубының ойыншысы Дастан Сәтпаев бар.
«Дарын» мемлекеттік жастар сыйлығы — талантты жастарды қолдаудың ең беделді марапаттарының бірі. Соңғы 30 жыл ішінде бұл жүлдені 360-тан астам қазақстандық жас иеленген. Олардың қатарында Нұрлан Өнербаев, Бақтияр Артаев, Серік Сәпиев, Денис Тен, Димаш Құдайберген, «МузАРТ» және «Бәйтерек» топтары сияқты танымал тұлғалар бар.
Ел игілігіне үлес қосып жүрген жас буынды қолдау алдағы уақытта да жалғасады.
Сурет: gov.kz
