Ақтөбедегі сауда үйлерінің бірінде қымбат смартфондарды ұрлап, ломбардқа өткізіп келген жасөспірім қыздар ұсталды. Олардың бұл әрекеті бейнебақылау камерасына түсіп қалған, деп хабарлайды Zhaiyqmedia ақпарат агенттігі.
Оқиға өткен жылдың желтоқсан айында болған. Полицияның мәліметінше, 28 желтоқсан күні екі бойжеткен сауда үйіндегі бутиктің ашық тұрғанын пайдаланып, сөреден екі «iPhone» телефонын жымқырып кеткен.
Бұл әрекеттері оңай іске асқан соң, олар үш күннен кейін сол дүкенге қайта оралып, тағы бір «iPhone» ұялы телефонын ұрлаған.
Тәртіп сақшылары бейнебақылау камераларындағы жазбаларды тексеру арқылы күдіктілерді көп ұзамай анықтады. Олар 2006 және 2007 жылы туған қала тұрғындары болып шықты.
Тергеу барысында олар кінәсін толық мойындап, ұрланған телефондарды ломбардқа өткізіп, ақшасын өз қажеттіліктеріне жұмсағанын айтты.
Қазіргі уақытта аталған дерек бойынша қылмыстық іс қозғалып, тергеу амалдары жүріп жатыр. Мұндай қылмыс үшін мүлкін тәркілеумен қатар, жеті жылға дейін бас бостандығынан айыру жазасы қарастырылған.
Фото: Әлеуметтік желіден
