АҚШ арнайы жасағы Венесуэла президенті Николас Мадуроны ұстау операциясы кезінде жаңа, белгісіз акустикалық қаруды қолданған болуы мүмкін. Бұл технология қарсыластың басын айналдырып, мұрнынан қан кетуіне себеп болған, деп хабарлайды Zhaiyqmedia ақпарат агенттігі.
Бұл туралы New York Post басылымы қауіпсіздік қызметінің бұрынғы қызметкерімен жасалған сұхбат стенограммасына сілтеме жасап жазды. Басылым дерегінше, америкалық күштер Венесуэла қауіпсіздік қызметін кәдімгі оқ-дәрісіз-ақ, күшті дыбыстық технология арқылы тез залалсыздандырған.
Оқиғаға куә болған адамның айтуынша, бұл технология Венесуэла қорғанысын аз күшпен әрі тиімді түрде басып-жаншуға мүмкіндік берген. Дыбыстық қарудың әсерінен адамдардың басы қатты айналып, тіпті қан кету жағдайлары тіркелген.
Алайда Пентагон бұл ақпаратқа қатысты әзірге ресми мәлімдеме жасаған жоқ. Сарапшылардың пікірінше, АҚШ әскерінде микротолқын немесе лазерге негізделген бағытталған энергия қарулары бойынша зерттеулер бар екені белгілі. Дегенмен, олардың нақты бір операцияда қолданылғаны туралы ресми дерек жоқ.
New York Post жариялаған бұл деректер әлі де расталмаған. Ақпарат негізінен куәгерлердің сөзіне және түрлі қауесетке сүйеніп отыр, сондықтан оқиғаның анық-қанығын білу үшін қосымша тексеру қажет.
Фото: Әлеуметтік желіден
