Қазақстанда бала саудасымен айналысқан қылмыстық топ мүшелеріне сот үкімі шықты. Қазақстан мен Қырғызстан азаматтары кәмелетке толмаған балаларды шетелдіктерге сатпақ болғаны үшін ұзақ мерзімге бас бостандығынан айырылды, деп хабарлайды Zhaiyqmedia ақпарат агенттігі.
Тергеу материалдарына сәйкес, сотталғандар Израиль азаматымен алдын ала сөз байласып, адам саудасымен айналысқан. Қазақстан азаматы Қырғызстан азаматынан ақшалай сыйақы мен түрлі мүлікке үш баланы сатып алғаны анықталды.
Кейін олар белгісіз бір діни рәсімді орындауды сылтауратып, балалардың денесін жалаңаштап, суретке түсірген. Бұл фотосуреттерді олар шетелдегі сыбайласына жіберіп отырған.
Сонымен қатар айыпталушылардың тағы екі баланы толық қамқорлығына алғаны белгілі болды. Тергеушілер олардың да осындай зорлық-зомбылықтың құрбаны болуы мүмкін екенін жоққа шығармайды.
Бұл іспен Ұлттық қауіпсіздік комитеті айналысып, қылмыстық топтың басқа да қатысушыларын анықтау бойынша жұмыс жүргізіп жатыр. Тергеу әлі жалғасуда.
Биыл 12 наурызда сот өз үкімін шығарды. Қылмыстық іс бойынша айыпты деп танылған қазақстандық 12 жылға, ал Қырғызстан азаматы 11 жылға сотталды. Сондай-ақ сот шешімімен олардың мүлкі тәркіленді.
Фото: Әлеуметтік желіден
