Украина президенті Владимир Зеленский мен Түркия президенті Режеп Тайып Ердоған Ыстанбұлда кездесіп, қауіпсіздік саласындағы ынтымақтастықты нығайтуға және газ жобалары бойынша жаңа қадамдар жасауға уағдаласты, деп хабарлайды Zhaiyqmedia ақпарат агенттігі.
Келіссөздер барысында тараптар екіжақты қарым-қатынасты, сондай-ақ Еуропа мен Таяу Шығыстағы ахуалды талқылады. Зеленскийдің айтуынша, бұл кездесу екі елдің стратегиялық серіктестігін одан әрі тереңдетуге бағытталған.
«Адам өмірін қорғауды күшейтіп, әлемнің барлық аймағындағы адамдардың қауіпсіздігін арттыру үшін бірлескен және үйлесімді іс-қимылдардың маңызы зор», — деп атап өтті Украина басшысы.
Владимир Зеленский екі ел қауіпсіздік саласында жаңа келісімдерге қол жеткізгенін мәлімдеді. Оның сөзінше, Украина өз тәжірибесімен, технологиясымен және сараптамалық мүмкіндіктерімен Түркияға қолдау көрсетуге дайын. «Бірлесіп жұмыс істеуге деген саяси ерік-жігер берік. Жақын күндері біздің топтар барлық мәселені егжей-тегжейлі пысықтайды», — деп толықтырды ол.
Фото: Әлеуметтік желіден
