Сурет: Aikyn.kz
Қазақстанның бірқатар өңірінде күн райы күрт өзгереді. Синоптиктер бүгін, 30 мамырда, жаңбыр мен шаңды дауыл болатынын ескертті, деп хабарлайды Zhaiyqmedia.kz ақпарат агенттігі.
«Қазгидромет» мамандарының мәліметінше, атмосфералық фронттардың әсерінен батыс, солтүстік және орталық облыстарда найзағай ойнап, екпінді жел соғады. Желдің жылдамдығы секундына 15-20 метрге жетеді деп күтілуде.
«Жаңбыр жауып, кей жерлерде шаңды дауыл тұрады. Әсіресе Батыс Қазақстан облысында ауа райы қолайсыз болады», — делінген хабарламада.
Төтенше жағдайлар департаменті тұрғындарға дауыл кезінде үйде болуды, терезелерді мықтап жабуды, ал жолда келе жатсаңыз, ағаштар мен биік құрылыстардан алыс жүруді сұрайды. Жақын маңдағы балалар мен қарт адамдарға ерекше көңіл бөлген жөн.
Алдағы күндері де ауа райы тұрақсыз болмақ. Синоптиктердің болжамынша, апта соңына дейін жаңбыр мен жел сақталады.
