«Қазгидромет» мамандары алдағы үш күнге арналған ауа райы болжамын жариялады. Еліміздің ірі қалаларында ауа райы құбылмалы болады: астанада аяз күшейіп, боран соқса, оңтүстікте көктемнің алғашқы лебі сезіледі, деп хабарлайды Zhaiyqmedia ақпарат агенттігі.
Астанада нағыз қыс салтанат құрады. Синоптиктердің болжауынша, қалада қар жауып, бұрқасын соғады. Түнгі уақытта ауа температурасы -22°C дейін төмендесе, күндіз -11…-17°C аралығында болады. Қала тұрғындары мен қонақтарына жылы киінуге кеңес беріледі.
Алматыда ауа райы біршама тұрақты. Жауын-шашын күтілмейді. Дегенмен, түнде қаланы тұман басып, жолдарда көктайғақ болады. Ауа температурасы түнде -5…-10°C, ал күндіз 0…+2°C шамасында жылы болады. Жүргізушілерге жолда абай болу қажет.
Шымкентте ауа райы құбылмалы болмақ – алдымен қар жауып, арты жаңбырға ұласуы мүмкін. Сондай-ақ тұман түсіп, көктайғақ болады және екпіні секундына 20 метрге жететін қатты жел соғады. Күндіз еліміздің басқа өңірлерімен салыстырғанда едәуір жылы: ауа +1-ден +5°C-қа дейін жылиды.
«Қазгидромет» мамандарының айтуынша, осындай ауа райы сейсенбіге дейін сақталады.
Фото: Әлеуметтік желіден
