«Қазгидромет» синоптиктері 2026 жылдың қаңтарына арналған алдын ала ауа райы болжамын ұсынды. Ресми мәліметке сүйенсек, алдағы қаңтарда еліміздің көп бөлігінде орташа температура қалыпты межеден 1–2°С-қа жоғары болады.

Бұл өзгеріс күннің күрт жылынуына емес, біраз өңірде жауын-шашынның әдеттегіден көп болуымен қатар жүреді. Сондықтан бұл ақпарат әсіресе жүргізушілер мен ауыл шаруашылығы секторындағы азаматтарға маңызды.

Бұл туралы Zhaiyqmedia.kz ақпарат агенттігі хабарлайды.

Синоптиктердің мәліметінше, қаңтар айында ауа райы қысқа тән құбылыстармен – боран, көктайғақ, тұман мен екпінді желмен алмасып отырады. Айдың бірінші күндерінде батыс өңірлерде -10…-18°С суық, күндіз -5…-12°С шамасында болады. Бірақ кейіннен аздап жылынуы мүмкін.

Қаңтарда қай өңірлерде көбірек қар күтіледі?

Павлодар, Шығыс Қазақстан, Солтүстік Қазақстан, Абай, Ақмола және Қарағанды облыстарының солтүстік-шығысында, сондай-ақ Алматы, Жамбыл, Түркістан және Жетісу облыстарының оңтүстік аймақтарында жауын-шашын мөлшері нормадан көп болады деп болжанған.

Солтүстік пен орталықта түнгі ауа температурасы -10…-20°С аралығында болса, күндіз -5…+3°С-қа дейін көтерілуі ықтимал. Ал шығыс өңірлерде бұл көрсеткіш -10…-18°С-қа дейін төмендеуі мүмкін.

Қаңтар айында қатты суық қай кездері күтіледі?

Екінші және үшінші онкүндіктерде суық ауа массаларының енуімен елдің солтүстігі, орталығы мен шығысында түнгі температура -25…-35°С-қа дейін жетіп, күндіз -15…-20°С шамасында болады.

Батыста бұл уақытта -20…-27°С дейін суытуы мүмкін, бірақ жекелеген күндері күндізгі жылы кезеңдер болып, 0…+5°С жылымық болуы ықтимал.

Оңтүстікте ауа райы тұрақты жылы болмайды: түнде 0…-5°С-тан -10…-20°С-қа дейін, күндіз +2…+12°С-тан -3…-13°С аралығында құбылады. Ай соңында мұнда да қатаң аяздар болып, кей күндері -20…-30°С-қа дейін суытуы мүмкін.