Ресми мәліметке сәйкес, 2026 жылдың 1 қаңтарынан бастап күшіне енген жаңа Салық кодексі бойынша қазақстандықтар үшін маңызды өзгеріс болды — зейнетақы төлемдерінен жеке табыс салығы (ЖТС) енді мүлде алынбайды.
Бұл жаңалық зейнетақы жинақтарын мерзімінен бұрын шешіп алған немесе болашақта зейнетке шығатын азаматтар үшін аса маңызды.
Бұл туралы Zhaiyqmedia.kz ақпарат агенттігі хабарлайды.
Бұған дейін зейнетақы қорынан ақша алған сәтте мемлекет 10% мөлшерінде ЖТС ұстайтын. Бұл ереже 2025 жылдың соңына дейін күшінде болды.
Енді міндетті, кәсіби және ерікті зейнетақы жарналарынан құралған барлық төлемдерге салық салу алынып тасталды. Яғни, азаматтар өз жинағын 100% көлемінде толық пайдалана алады.
Салықтық қарыздар кешірілді: кімдерге қолданылады?
Жаңа заңдағы басты жеңілдіктің бірі — бұған дейін зейнетақы ақшасын тұрғын үй алуға немесе емделуге пайдаланып, салық төлемін кейінге қалдырған азаматтарға қатысты.
Олар 10% көлеміндегі ЖТС-ты кейіннен — зейнетке шыққан соң 16 жыл бойына бөліп төлеуге келісім берген еді. 2026 жылдан бастап бұл міндеттемелер автоматты түрде жойылады.
Яғни, енді азаматтар кейін төлеуге тиіс болған салықты мүлде төлемейді.
Алайда, бірден салық төлегендер үшін ақша кері қайтарылмайды. 2025 жылға дейін төленген салық заң шеңберінде түпкілікті деп танылады.
Ерікті жарналар бойынша не өзгерді?
Бұрын ерікті жарналар салған кезде салықтық жеңілдік жарна аударған сәтте берілетін. Енді ол механизм өзгеріп отыр.
2026 жылдан бастап енді салық жеңілдігі жарнаны жинақтағанда емес, оны алған кезде беріледі. Демек, ДПВ есебінен алынған ақша енді салықтан босатылады.
Жұмыс берушілер үшін артықшылықтар сақталады — олар ерікті жарналарды өз қызметкерлері үшін аударғанда, бұл шығындар корпоративтік табыс салығын есептегенде шегеріледі.
Алайда шетелге тұрақты тұруға кеткен азаматтар бұл салықтық жеңілдіктерден тыс қалды. Олар Қазақстаннан кетпес бұрын зейнетақы жинағын алса, бүкіл салық ұсталады.
Үкімет болжамынша, бұл өзгеріс бюджетке шамамен 4,1 млрд теңгеге дейін «шығын» әкелуі мүмкін. Дегенмен, әлеуметтік тиімділігі ескеріліп, бұл қадам оң шешім ретінде қабылданды.
